Tirisanommogo e thusa molemirui yo o sa tswang go simolola temothuo go gatela pele gore a kgone go dira kgwebo

AfriForum le Saai ba kopane le Kgosana Gaongalelwe Moiloa, mothei-mmogo wa Mokgatlho wa Bahurutshe Ba Ga Moiloa, mo kgatelopeleng ya gagwe go tswa go molemirui yo o sa ntseng a fatlhoga go fitlha a nna molemirui wa kgwebo. Go tsentswe sedirisiwa se se nosetsang ka go kgatsha metsi se se dirisang motlakase o o dirang ka mogote wa letsatsi go tokafatsa ntshokuno, go ungwa ka metlha le go nna le dipoelo. Kgosatsana Gaongalelwe o setse a nnile le thobo e e atlegileng ya dikgetsana di le 200 tsa ditapole ka 2024 e bile o lemile ditapole, ditamati, dipepere tse ditala, dierekisi le dieie tse di khibidu mo setlheng sa ga jaanong sa temo. Gape o dira temo e nngwe gape ya ditapole tse Lekgotla la Patlisiso ka tsa Temothuo le tlileng go dira ditekeletso ka tsone. O dira temothuo ya gagwe mo karolong ya polase ya Jagersfontein mo Kgaolong ya Mahikeng ka gonne a le mojaboswa wa Mokgatlho wa Batsweneng wa Tlhakanelo-Ditsha, o polase eno e leng ya one.

“Toro ya me ke go gatelapele go nna molemirui ka botlalo wa mogwebi gore ke kgone go tlhokomela ba lelapa la me le go thusa setšhaba sa gaetsho ka go tlhama ditiro. Ke leboga thata e bile ke itumeletse tsela e sedirisiwa sa go nosetsa se tlileng go nna le matswela a a molemo ka gone mo go ungweng ga kgwebong ya me ya temothuo. Mokgatlho wa Bahurutshe Ba Ga Moiloa o thusa basadi go simolola ditshingwana tsa merogo kwa magaeng a bone gore ba kgone go iphepa le go fepa bana ba bone go tswa mo tshingwaneng eo le go rekisetsa setšhaba ntshokuno ya bone, ka go dira jalo ba tokafatse maemo a bone a botshelo”, go bolela jalo Kgosatsana Gaongalelwe, mothei-mmogo wa Mokgatlho wa Bahurutshe Ba Ga Moiloa.

“Naga ya rona le kgaolo ya rona di tlhoka balemiruri ba ba oketsegileng ba kgwebo. Go dira gore balemirui ba ba sa tswang go simolola temo e nne bagwebi, gape go thusa ka go dira gore go se nne le tlhaelo ya dijo le go dira gore batho ba kgone go itlamela – e leng yone fela tsela e e ka feditsang ruri lehuma. Ka jalo, ke tshiamelo mo go Saai go tsaya karolo mo letsholong leno la go thusa balemirui go nna bagwebi le go dirisa metšhine”, go bolela jalo Ngk. Theo de Jager, Modulasetulo wa Boto ya Bakhuduthamaga ba Saai.

“Go tlhama dikamano tse di siameng le tirisanommogo magareng ga merafe ya setso, le go nonotsha kgono ya merafe eno ya go itlamela, go botlhokwa thata gore merafe ya setso ya naga ya rona e kgone go itlamela le go tshedisana mmogo ka kagiso. Bokamoso jo bo itumedisang jo re bo eleletsang bana ba rona bo ka fitlhelelwa ka go dirisana mmogo ga batho ba maemo a a tlwaelegileng fela ba ba jaaka bano. AfriForum e leboga thata – segolo maloko a rona – gore re na le bokgoni jwa go nna le seabe mo letsholong le le solofetsang thata jaana. Ke tshiamelo mo go AfriForum go nna karolo ya Kgokagano ya Merafe ya Setso e e kgontshang merafe e e farologaneng ya setso go leba dilo ka mokgwa o o tshwanang le go dirasana mmogo go netefatsa gore rotlhe re tla nna le bokamoso jo bo itumedisang”, go bolela jalo Barend Uys, Tlhogo ya Dikamano le Tirisano Gare ga Ditso Tse di Farologaneng kwa AfriForum.

Kgosatsana Gaongalelwe ke setlogolo sa ga Kgosi Moiloa II, yo e neng e le moeteledipele wa Bahurutshe Ba Ga Moiloa go simolola ka 1845 go fitlha ka 1875 le yo o neng a boloka dikamano tse di siameng le Ma-Aforikanere a Repaboloki ya Aforika Borwa (ZAR). Kgosi Moiloa II le Bahurutshe ba gagwe, mmogo le merafe e mengwe ya setso e e jaaka ya Barolong, Bataung, Batlhaping, Bafokeng le Griqua, e ne e le baja-mmogo le MaVoortrekker ka dingwaga tsa bo1830 ka nako ya go lwa le Kgosi Ma-Ndebele a ga Kgosi Mzilikazi.

“Kgwebisano le kgolagano magareng ga bagologolwane ba rona e nnile le seabe se se botlhokwa mo go sireletseng merafe ya rona mo metlheng eo. Re fano gompieno ka ntlha ya tiro ya bone ya ka natla le go ikentsha ga bone setlhabelo. Re na le tšhono gape gompieno ya go tlhopha go dirisana mmogo le go aga botsalano go netefatsa gore bokamoso jwa bana ba rona ba merafe e e farologaneng ya setso mo nageng ya rona e tla nna jo bo itumedisang”, Kgosatsana Gaongalelwe o konela jalo.